قازاق حالقى ءۇشىن جىلقىنىڭ ورنى ەرەكشە. سوڭعى جىلدارى قىزىلجار وڭىرىندە ۇلتتىق ويىندارمەن بىرگە بايگە جارىسى دا جاقسى دامىپ كەلەدى. بۇل كۇنى سولتۇستىكقازاقتاندىقتارمەن بىرگە اقمولا, اقتوبە وبلىستارىنىڭ, استانا قالاسىنىڭ باپكەرلەرى ۇكىلەپ قوسقان جۇيرىكتەر بايگە دەسە ىشكەن اسىن جەرگە قوياتىن جانكۇيەرلەردىڭ دەلەبەسىن قوزدىردى.
قىز قۋدا الينا گاپاروۆا الەكساندر ليتۆينوۆقا قارا كورسەتپەي كەتتى. 2000 مەترگە شاپقان ۇشقىر اتتار اراسىنان اقتوبە وبلىسىنىڭ نامىسىن قورعاعان ەلديار سۇلەيمەنوۆ جەڭىمپاز اتاندى. 1600 مەتر قاشىقتىقتا وتكەن جەلىس اتتارى جارىسىندا استانالىق ءابدۋالى نۇراحماتوۆتىڭ مەرەيى ۇستەم بولدى. 5 مىڭ مەتر قاشىقتىقتا تايىنشا اۋدانىنىڭ وكىلى ەرنار قۇنانباەۆ سورە سىزىعىن ءبىرىنشى بولىپ قيدى. باسقا قاشىقتىقتار بويىنشا دا بايگە اسا تارتىستى بولدى.
جازعى اتسپورتى ماۋسىمىنىڭ اشىلۋ سالتاناتىندا «ەڭ ۇزدىك سايگ ۇلىك» بايقاۋى وتكىزىلدى. جال-قۇيرىعى توگىلگەن بەس ارعىماقتىڭ اراسىنان «گرينگو» اتتى جەلمەن جارىسقان جۇيرىك لايىق دەپ تانىلدى.
يپپودروم جانىنا كيىز ۇيلەر تىگىلىپ, جۇرتشىلىققا دامدىلىگى ءتىل ۇيىرەتىن ۇلتتىق تاعامدار ۇسىنىلدى.
اتجارىستىڭ جەڭىمپازدارى «ەكسپو-2017» حالىقارالىق كورمەسى قارساڭىندا استانادا وتەتىن بايگەگە قاتىسۋعا جولداما الدى.
ءومىر ەسقالي,
«ەگەمەن قازاقستان»
